Þjóðarleiðtoga sjálfstæðs ríkis, sem hefur ekkert til saka unnið á alþjóðavettvangi, hefur verið rænt, án dóms og laga. Þetta gerist í kjölfar margra vikna af árásum á skip og mannvirki í landinu, morða á fjölda fólks, og áratuga langra ólöglegra efnahagsþvingana.

Varaforseti Venesúela, Delcy Rodríguez, fordæmdi af hörku framferði Bandaríkjahers í yfirlýsingu í ríkisútvarpi Venesúela í morgun. Hún kvaðst ekki vita hvar forsetinn og eiginkona hans væru niðurkomin. Það sem hún vissi var að loftárásir voru gerðar á höfuðborgina í nótt þar sem fjöldi fólks missti lífið. Hún lýsti yfir neyðarástandi og hefur virkjað þjóðvarnarlið Venesúela til að verja landið gegn þessari skelfilegu árás á sjálfstæði landsins.

Stórfelldar loftárásir voru einnig gerðar á hafnir Caracas. Óvíst er hversu margir létu lífið í árásunum eða hversu miklum skaða loftárásirnar ollu. Myndskeið hafa birst á samfélagsmiðlum á borð við Telegram og X.

Síðasta embættisverk forsetans áður en þessir atburðir áttu sér stað var opinber fundur með utanríkisnefnd Kína. Mikil hætta er á að þessi ólöglegi gjörningur muni hafa gríðarlega alvarlegar afleiðingar á alþjóðavettvangi.

Bandaríkjastjórn, með fullu samþykki íslenskra stjórnvalda, hefur háð miskunnarlaust áróðurs- og efnahagsstríð gegn Veneseúela allt frá því að stjórnvöld sem voru í óþökk þeirra voru kosin í landinu árið 1998. Nánar má lesa um það í greinum sem birst hafa á Neistum.

Í ljósi undanfarandi aðgerða Bandaríkjanna gagnvart Venezúela virðist ljóst að leifturárás þessi er liður í víðtækari pólitík heimsveldisins og tilgangurinn er þá a.m.k. tvöfaldur: a) Bandaríkin þurfa að komast yfir auðlindir Venesúela. Trump lýsti því yfir skömmu fyrir jól að Venezúela hefði stolið „olíunni okkar“ og yrði nú að skila henni aftur. b) Hins vegar er þetta valdaskiptaagerð gegn „óæskilegri“ ríkisstjórn. Samkvæmt nýrri öryggisáætlun sinni ætla stjórnvöld í Washington að koma á fullri stjórn á öllum löndum Rómönsku Ameríku, og sérstaklega velta úr sessi öllum stjórnvöldum sem eiga í einhverjum tengslum eða samvinnu við Kína og Rússland.

Það er skylda íslenskra stjórnvalda að fordæma þessa kolólöglegu aðgerð gegn þjóðarleiðtoga og almenningi sjálfstæðs ríkis og taka þátt í alþjóðlegum þrýstiaðgerðum, eins og alþjóðalög gera kröfu um. Einnig verður að krefjast þess að íslenskir blaðamenn noti jafnhart orðalag gegn þessum ólöglegu hernaðaraðgerðum og þeir gera gagnvart aðgerðum sem Vesturlöndum er ekki að skapi, ellegar hafa þeir engan trúverðugleika.