Heimsvaldaverðlaun Nóbels
—
Ákvörðun norsku Nóbels-nefndarinnar þetta árið hlýtur að fara í sögubækurnar. Ekki aðeins er handhafi verðlaunanna allt annað en friðarsinni, heldur er Venesúelska hægri konan María Corina Machado náinn samstarfsmaður Bandarískra yfirvalda og verið fjármögnuð af þeim í að minnsta tvo áratugi. Nóbels nefndin var því ekki að hafna Trump heldur færa honum gjöf en undanfarnar vikur hafa Bandarísk herskip verið staðsett í Karíbahafinu undan ströndum landsins.
María þessi er enginn nýgræðingur þegar kemur að stjórnmálum en hún hefur undanfarna áratugi verið einn af þekktustu stjórnarandstæðingum Venesúela en hún er leiðtogi hægriflokksins Vente Venezuela, sat á þingi 2011 til 2014, og hefur sóst eftir forsetaembættinu, síðast í fyrra.
Þrýstir á Bandaríkin um að fremja valdarán í landi hennar
Staðreyndin er að María Machado hefur árum saman starfað með Bandarískum yfirvöldum við það að grafa undan stjórnvöldum í eigin landi og kallað eftir að Bandaríkin beiti bæði viðskiptaþvingunum og hernaðaríhlutun gegn Venesúela. Þvingunum sem hafa haft skelfilegar afleiðingar fyrir efnahag og almenning í landinu en við á Íslandi höfum ekki farið varhluta af afleiðingum en þúsundir flóttamanna frá Venesúela hafa flúið til Íslands síðustu árin. Samkvæmt rannsókn CEPR stofnunarinnar varð efnahagsstríðið valdur að dauða 40 þúsund borgara á árunum 2017-18.
María Machado hefur hún tekið við fjármagni frá Bandaríkjunum í gegnum National Endowment for Democracy (NED), stofnun sem er þekkt fyrir að grafa undan lýðræðislega kjörnum stjórnvöldum sem ekki eru þóknanleg Bandaríkjunum líkt og fjallað var um af David Ignatius í Wahsinton Post á níunda áratugnum.
Hún var líka viðstödd valdarán gegn Hugo Chavez árið 2002 sem entist þó aðeins í 47 klukkustundir vegna þess að almenningur landsins reis upp og krafðist þess að Chavez yrði áfram forseti. Hún skrifaði undir hinn svokallaða „Carmona úrskurð“ sem leysti upp þing landsins, stjórnarskrá, og hæstarétt og gerði Pedro Carmona að forseta.
Greg Grandin, sagnfræðingur frá Yale háskóla, sagði í viðtali á Democracy Now að valið væri ekkert annað en sjokkerandi: „þau hafa verðlaunað manneskju sem er algjörlega í liði með hernaðarsinnuðustu og myrkustu hliðum Bandarískar heimsvaldastefnu“. María sjálf tileinkaði Donald Trump verðlaunin á Twitter.
Stuðningsmaður Netanyahu og hægri öfgaflokka
María Machado er að auki stuðningsmaður Ísraels og Líkúd-flokksins en hún sendi Benjamin Netanyahu sérstakt bréf árið 2018 þar sem hún falaðist eftir stuðningi við að losna við stjórnvöld í Venesúela. Þá hefur hún lýst því yfir að ef hún verði forseti Venesúela muni hún opna aftur á diplómatísk samskipti á milli ríkjanna og beita sér fyrir því að opna sendiráð Venesúela í Jerúsalem.
Í febrúar ávarpaði María ráðstefnu evrópskra ytri hægrimanna, svokallaðra Patriots.eu, en yfirskrift ráðstefnunnar var „Make Europe Great Again“. Meðal þátttakanda á ráðstefnunni, sem haldin var af spænska hægriflokknum Vox, var Líkúd-flokkur Benjamin Netanyahu. Auk skilyrðislauss stuðnings við þjóðarmorðið deila þessir evrópsku ytri hægriflokkar íslamófóbískum rasisma sínum með síonistum.
Undanfarnar vikur hefur Trump stjórnin aukið þrýsting sinn á Venesúela til muna og staðsett fyrir utan strendur landsins flota herskipa. Trump stjórnin segist vera að berjast gegn skipulagðri glæpastarfsemi og hefur ásakað forseta Venesúela, Nicolas Maduro, um að fara fyrir glæpasamtökum sem smygli fíkniefnum til Bandaríkjanna. Þá hafa fjölmiðlar greint frá því að Bandaríski herinn hafi byrjað að færa þyrlur og önnur hergögn nær landinu en í gær bað Venesúela Sameinuðu þjóðirnar um neyðarfund vegna yfirvofandi hernaðaraðgerða.
Að veita friðarverðlaunin handlangara Bandaríkjanna á meðan Trump hótar valdaskiptiaðgerðum í Venesúela er bein stuðningsyfirlýsing við slíka aðgerð.
Raunveruleikanum snúið á haus
Allt lítur út fyrir að Trump hafi fengið það sem hann vildi, stuðning við yfirvofandi stríð sitt við Venesúela, öfugt við það sem margir hafa haldið fram um málið á samfélagsmiðlum síðasta sólarhringinn en fjölmiðlar eins og Samstöðin sögðu í fyrirsögn í gær að með valinu hafi „von” vaknað um betri heim. Umfjöllun annara fjölmiðla og Ríkisútvarpsins nefnir ekki tengsl María Machado við Bandarísk stjórnvöld eða stuðning hennar við Ísrael.
Raunveruleikanum var snúið á haus þegar Nóbelsnefndin heiðraði Maríu fyrir starf sitt við að stuðla að „friðsamlegum umskiptum frá einræði til lýðræðis“ líkt og Jørgen Watne Frydnes, formaður norsku nefndarinnar sagði þegar hann tilkynnti um verðlaunin. Þar með endurómaði hann áróður heimsvaldastefnunnar sem ávalt kallar andstæðinga sína einræðisherra til að framleiða samþykki við hernaðaraðgerðir. Trúverðugleiki friðarverðlauna Nóbels er nú enginn og var hann lítill fyrir.
