Vinstrið er ekki vinstri lengur
—
Eitt við hið svokallaða frjálslynda „vinstri“ er þessi blanda af vanþekkingu á sögunni, stjórnmálum, og hugmyndafræði, og í raun andúð á þekkingu. Í það minnsta ákveðinni þekkingu. Þekking á sósíalískum fræðum er oft afskrifuð því hún þykir of gömul. Ég er sagður klæðast ullarnærfötum og hljómi eins og ég sé fæddur 1926 því ég er ekki hræddur við að nota orð eins og auðvald og „kratar“. Sem er furðuleg hugmynd enda virðist þetta aðeins eiga við stjórnmál en ekki önnur fræði. Það eru ekki margir að afneita afstæðiskenningunni þó að Albert Einstein (sem var sósíalisti!) sé löngu dauður. En af einhverjum ástæðum finnst mörgum innan frjálslynda vinstrisins í lagi að afskrifa Karl Marx og hugmyndir hans því hann sé bara einhver gamall kall. Þessi afneitun á sögunni og hunsun á þekkingu helst í hendur við tilfærslu vinstrisins til hægri og inn á miðjuna.
Hitt er svo auðvitað að það eru sósíalísk ríki sem eru á margan hátt að leiða tækniþróun og vísindi í heiminum í dag. Kínversk stjórnmál og samfélag byggja að miklu leyti á marxisma og sigrar Kína eru að öllu leyti vegna þess að landið er sósialískt og hefur þannig getað byggt upp og framkvæmt alls konar hluti sem ómögulegt er að gera innan vestursins þar sem auðvaldið hefur neitunarvald. Frjálsræðisþróun Kína undir Deng Xiaoping var líka möguleg vegna þess að landið er sósíalískt. Kína gat þannig aukið framleiðslu og velsæld án þess að gefa kapítalinu nein pólitísk völd. Sem er í raun allur vandinn á vesturlöndum, auðvaldið hefur allt of mikil völd.
Ekki að allt sem Marx hafi sagt hafi gengið eftir. Alls ekki, en að afneita þekkingu á svona yfirborðskenndan hátt sýnir okkur hvernig vinstrið í dag er upp fullt af and-intellektúalisma og andúð á þekkingu sem ekki passar við þeirra hugarheim.
Einn stærsti vandi vinstrisins er þessi afneitun á þekkingu og sósíalískum fræðum. Vinstrið er týnt og hefur glatað þekkingu á stéttarbaráttunni og stéttarhugtakinu. Skilur ekki hvar við erum stödd í sögunni. Veit ekki einu sinni hvernig skilgreina eigi sósíalisma ef það hefur þá einhvern áhuga á því. Þetta er auðvitað líka hluti af ástæðunni hvers vegna vinstrið vill fara í ESB. Það telur það lausn á vanda samfélagsins. Að það sé hægt að kjósa betri framtíð í þjóðaratkvæðagreiðslu án þess að þurfa að hafa neitt fyrir því. Að ESB muni á einhvern hátt færa okkur betri lífskjör á silfurfati.
Stundum langar mig að spyrja þetta fólk: Ef sósíalismi og kommúnismi eru svona hræðilegar hugmyndir, hvers vegna er þá allt versta fólk veraldar líkt og Donald Trump og Marco Rubio logandi hrætt við kommúnisma? Hvers vegna er Trump að handtaka og ofsækja sósíalista og kommúnista? Hvers vegna Bandaríkin hafi í áratugi verið í stríði gegn kommúnisma? Svarið ætti að vera augljóst.
