Móðir allra hernaðarlegra glappaskota
—

Þann 28. ágúst 2026 var ég í þættinum „The Chris Hedges Report“ og ræddi þar aðallega um yfirstandandi hörmungar í Íran. Chris vildi fá mig til að útskýra hvers vegna ég teldi Íransstríðið vera mesta hernaðarlega glappaskot í sögu Bandaríkjanna. Það er auðvitað mikið sagt þegar maður gerir sér grein fyrir því að það á sér að minnsta kosti tvo meiri háttar keppinauta frá lífsskeiði okkar Chris: Víetnamstríðið og Íraksstríðið.

Íranstríðið hefur samt vinninginn að mínu mati, vegna þess að

1. Við fórum í það stríð á þeirri fölsku forsendu/fullyrðingu að Íran væri alveg við það að eignast kjarnorkuvopn;
2. Við höfðum siguráætlun – að loftárásir einar og sér myndu leiða til valdaskipta – nokkuð sem hefur aldrei virkað og virkaði ekki heldur í þetta sinn;
3. Við höfðum enga varaáætlun út frá þeim möguleika að Íran myndi loka Hormússundi;
4. Okkur mistókst að ná neinu af fjórum meginmarkmiðum okkar – stjórnarskiptum, að binda enda á getu Írans til kjarnorkuauðgunar, að binda enda á getu Írans til að smíða langdrægar eldflaugar og að binda enda á stuðning Írans við Hamas, Hezbollah og Húta;
5. Sundinu var lokað, sem hefur þegar valdið alþjóðahagkerfinu verulegum skaða og gæti valdið miklu meiri skaða – munum að Trump forseti hefur áhyggjur af því að feta í fótspor Herberts Hoover [sem var forseti Bandríkjanna 1929-33, í heimskreppunni, mistókst að fást við hana og féll fyrir F.D. Roosevelt 1932];
6. Við grófum mjög undan vandlega uppbyggðu bandalagskerfi okkar við Persaflóa;
7. Nánast allar herstöðvar okkar á svæðinu hafa annaðhvort skemmst mikið eða verið eyðilagðar, svo mjög að við höfum flutt flestan herútbúnað okkar burt af Persaflóasvæðinu og munum líklega ekki geta snúið aftur;
8. Við höfum gengið svo á birgðir okkar af lykilvopnum að við höfum veikt fælingarmátt okkar í Austur-Asíu, Evrópu og jafnvel á vesturhveli jarðar;
9. Við höfum valdið orðspori okkar sem traustur og vís bandamaður gríðarlegum skaða;
10. Við höfum bætt hernaðarstöðu Írans á Persaflóasvæðinu verulega; og
11. Það virðast ekki vera miklar líkur – ef til vill engar – á því að við náum neins konar kjarnorkusamningi við Íran, sem eitt sinn var þó talið afar mikilvægt. Reyndar eru talsverðar líkur á því að Íran muni eignast kjarnorkuvopn. Trump forseti hefur svo sannarlega gefið írönskum leiðtogum – og öðrum leiðtogum kjarnorkuvopnalausra ríkja um allan heim – öflugan hvata til að komast yfir kjarnorkufælingarmátt.

Það er erfitt að ímynda sér stærra hernaðarlegt glappaskot.

Hér má sjá viðtal Chris Hedges við Mearsheimer:

Sótt á Substack Mearsheimers https://mearsheimer.substack.com/ þann 1. september