Vinstrið á að styðja sjálfsákvörðunarrétt Írans
—
Ísrael lítur á Íran sem sinn helsta andstæðing í vestur Asíu og Bandaríkin hafa lengi viljað steypa hinni svokölluðu klerkastjórn sem hefur verið einn öflugasti bakhjarl Palestínu og baráttunnar gegn heimsvaldastefnunni síðustu árin. Íran er eitt fárra landa sem hefur reynt að styðja Palestínu í verki. Það er erfitt að sjá hvað er að gerast þarna núna en ég get fullyrt að almenningur í Íran er ekki sameinaður gegn stjórnvöldum. Árás Ísraels og BNA í fyrra jók stuðning við stjórnvöld af augljósum ástæðum. Alveg eins og árásin á Venesúela mun auka stuðning við Chavismo hreyfinguna.
Ég sé að margt fólk er að túlka lokun internetsins í landinu sem merki um að stjórnin sé að fara að fremja voðaverk. Vandinn er að þetta gæti allt eins verið leið fyrir Íran til að verja sig gegn tilraunum Ísraels til að skapa upplausn í landinu og á endanum freista þess að fremja einhverskonar valdarán/valdaskiptaaðgerð til að koma að stjórnvöldum hliðhollum Ísrael og Vesturlöndum.
Trump segir á samfélagsmiðlum í dag að Íranir séu að leita að frelsi og að Bandaríkin séu tilbúin að hjálpa. Mike Pompeo fyrrverandi utanríkisráðherra sagðist á X fyrir nokkrum dögum óska Írönum sem mótmæltu gleðilegs nýs árs og líka „Mossad-útsendurunum sem gangi við hlið þeirra“. Samt er ekkert í Íslenskum miðlum um aðkomu heimsvaldasinna að þessum atburðum. Enda er heimsvaldastefnan einfaldlega ekki til í vestrænum fjölmiðlum. Bara í gær kom fram í Heimildinni að forsætisráðherra okkar „treysti“ Bandaríkjunum. Eftir allt sem á hefur gengið valdi hún þennan tímapunkt til að lýsa yfir stuðningi og trausti við Trump stjórnina.
Nei, Íran er ekki illt land, sósíalíska ríkisstjórn Venesúela er ekki ill og ekki Maduro heldur. Rússland er ekki illt land. Kína er ekki ólýðræðislegt einræðisríki. Gaddafi var ekki illmenni. Það voru engin útrýmingarvopn í Írak. Hamas nauðgaði ekki konum 7. október eða setti börn í ofna. Maduro er ekki eiturlyfjasmyglari. Donald Trump og ríkisstjórn hans eru hins vegar núna að réttlæta aftökur lögreglunnar og ICE á saklausum borgum í Minnesota. Samt kalla fjölmiðlar hann ekki harðstjóra.
Bandaríkin vilja veikja Íran því Íran er sjálfstætt ríki sem hefur neitað að beygja sig undir vilja Bandaríkjanna. Íran hefur líka yfir að ráða olíu og auðlindum og er hernaðarlega mikilvægt í áætlunum Bandaríkjanna við að einangra Kína.
Ekkert af þessu þýðir að ég styðji hugmyndafræði eða allt sem írönsk stjórnvöld geri. Slíkar ásakanir eru barnalegur og einfeldningslegur útúrsnúningur. Ég er sósíalisti, stjórnvöld í Íran eru ekki sósíalísk. Ég styð einfaldlega sjálfsákvörðunarrétt þjóða og sagan sýnir okkur að Bandaríkin hafa oft og mörgum sinnum notað óeirðir og mótmæli ákveðinna hópa innan þessara landa til að brjóta þau upp, grafa undan og fella, svo hægt sé að koma að stjórnvöldum hliðhollum Bandaríkjunum og Vesturlöndum. Bandaríkin hafa æði oft fjármagnað og skapað óeirðir í þessum tilgangi.
Því miður eru sósíalistar oft einir í því að mótmæla yfirgangi Bandaríkjanna, kratar eru oftar en ekki í stuðningsliði heimsveldisins með einum eða öðrum hætti. Segjast vera á móti íhlutunum Bandaríkjanna en endurvarpa áróðrinum gagnrýnislaust. Maduro er einræðisherra segja þeir allir í kór líkt og um einhverskonar trúarjátningu sé ræða. Líkt og Bernie Sanders í gær á X, hann byrjaði færslu sína um Venesúela bókstaflega á línunni: „Maduro is a dictator“. Lygar til að réttlæta yfirgang og blóði drifna sögu heimsveldisins.
