Fréttastofur eins og RÚV hafa verið duglegar að greina frá stríðinu í Úkraínu. Nú síðast var greint frá því að „Rússar skutu ofurfrárri eldflaug á Úkraínu“ þar sem fjórir voru drepnir. Í fréttinni segir svo að „[m]eðal þess sem Rússar réðust að voru vatnsveita, verslanahverfi, skólar og fjölbýlishús, að sögn úkraínskra yfirvalda.“ Svo grimmir eru Rússar.

Það sem fréttastofa RÚV, né heldur nokkur íslensk fréttaveita, greindi hins vegar ekki frá er að á sama tíma, eins og svo oft síðustu 12 ár, hefur her Úkraínu, með aðstoð NATO-ríkjanna, gert linnulausar árásir á eigin borgara, í austur Úkraínu. Um síðustu helgi voru til dæmis gerðar umfangsmiklar, af mjög yfirlögðu ráði, sprengju- og drónaárásir á borgaraleg skotmörk. Meðal skotmarkanna voru stúdentagarðar Starobelsk háskólans í Luhansk, þar sem 86 stúdentar voru til húsa. Fjöldi látinna í árásum helgarinnar þar í borg voru 21, og 63 særðust. Meðal hinna látnu voru 6 kornabörn. Gerendurnir voru her Úkraínu, með vopnum frá NATO.

Þetta er ekkert nýtt. Stríð hefur verið háð í austurhéruðunum, sem sameiginlega eru kölluð Donbass, í 12 ár. Þetta stríð hófst þegar kjörnum forseta landsins og í kjölfarið ríkisstjórnarinnar, var steypt af stóli af stjórnarandstæðingum, með dyggum stuðningi bandarískra, breskra og ísraelskra stjórnmálamanna og í kjölfar mikilla mótmæla í Kænugarði.  Í austurhéruðunum, þar sem stjórnin og forsetinn hafði mest fylgi, var valdaskiptunum harðlega mótmælt; svo mjög að gripið var til vopna. Frá sjónarhóli þeirra hafði verið framið valdarán og stjórn þeirra vikið frá með ólögmættum hætti. Þetta var þeirra forseti; þeirra ríkisstjórn. Í kjölfarið hófst stríð sem kostaði á 15 þúsund óbreyttra borgara, nánast alfarið íbúa í Donbass héruðunum, lífið á milli 2014 og 2022.

Ítarlega var fjallað um þennan hluta m.a. hér. Það sem þar stendur er óþarfi að endurtaka nú. Það sem skiptir máli hér er kerfisbundin þöggun fjölmiðla hérlendis á stríðsglæpum annars aðilans, sem gefur lesendum falska mynd af því sem á sér stað í raun.

Frá innrás Rússa hefur árásum íbúa austur Úkraínu, framin af herliði Kænugarðsstjórnarinnar, einungis fjölgað og þær versnað. Ákaflega lítill áhugi hefur verið fyrir að fjalla um árásir á stjórnarandstæðinga í Úkraínu. Meðal þeirra fáu sem hefur verið á svæðinu er fréttakonan Eva Bartlett, en hún hefur tekið viðtöl við íbúa þar og fylgst með ástandinu frá árinu 2019. Í samantekt hennar hér má lesa um hrikalegar árásir á útimarkað fylltan óbreyttum borgurum, vöggudeild spítala Donetsk, notkun jarðsprengna sem líta út eins og leikföng og hafa dregið fjölda barna til dauða, sprengiárásir á leikskóla, á hótel fyllt blaðamönnum, á sjúkrabíla og sjúkraflutningafólk, elliheimili, fjölbýlishús og svo mætti lengi halda áfram.

En áhuginn fyrir örlögum þessa fólks er enginn á Vesturlöndum. Ef minnst er á morð á óbreyttum úkraínskum borgurum af hendi stjórnarhermanna eða hersveita þeim tengdum er það annað hvort hunsað, eða gefið í skyn að þetta fólk eigi ekkert betra skilið þar sem það eru handbeinar sjálfs Pútíns. Höfum í huga að þetta eru óbreyttir borgarar; fólk sem reynir að lifa sínu lífi. En um árásirnar á það fólk ríkir algjör þögn. Þau eru ekki réttu Úkraínumennirnir.

Hér er ekki verið að réttlæta neitt; öll mannslíf eru jafnmikils virði. En spurningin til þeirra sem froðufella hvað ákafast yfir þeim sem óska friðsamrar lausnar á þessum hörmungum og þrástagast á hinni ákaflega  barnalegu Hitler-útskýringu á því sem á sér þarna stað er: Hvað veldur því að örlög þessara Úkraínumanna skipta svo litlu máli? Ef þið standið með Úkraínu, af hverju þá ekki Úkraínu allri, einnig þeim sem eru á móti Maidanstjórninni? Þeir sem vilja skrifa þessar árásir á innrás Rússa árið 2022, hvað útskýrir árásir Úkraínuhers, auk annarra vígasveita (stundum beinlínis nasistasveita), á þetta fólk átta árin áður?

Hvað varðar þessum bjagaða fréttaflutningi Rúv og annarra fréttastofa, þar sem einungis er greint frá illvirkjum annars aðilans, en illvirki mótaðilans þöguð í hel, þá skal þetta sagt: Almenningur hefur rétt á að mynda sér afstöðu sjálfur, án þess að vera leiddur af niðurstöðunni með valkvæmri þögn.

Eftirmáli

Eins og fram kom hefur árásin á Starobilsk-skólann þegar haft alvarlegar afleiðingar fyrir Úkraínu. Margt bendir þó til að afleiðingarnar geti orðið stórum víðtækari, jafnvel markað kaflaskil stigmögnunar. Rússneska utanríkisráðuneytið hefur lýst yfir að „,mælirinn sé fullur“. Sergei Lavrov hringdi í kollega sinn Marco Rubio þann 25. maí og tilkynnti honum að Rússar myndu nú ráðast skipulega á bæði hergagnaiðnað og stjórnstöðvar í Kiev. Þetta tjáir opinberi fréttamiðillinn RT. Útlendingar og diplómatar eru hvattir til að yfirgefa úkraínsku höfuðborgina hið skjótasta.

Mynd á forsíðu: Frá árinu 2015 til dagsins í dag hefur úkraínski herinn látið rigna yfir borgir Donbass svokölluðum „pedal mines“. Þessi vopn eru bönnuð skv. alþjóðalögum, enda bitna þær einungis á óbreyttum borgurum og líta út eins og leikföng. Sjá nánar hér.