Til íhugunar um ESB klúbbinn
—
Hér að neðan er upptaka af fundi í Safnahúsinu í Reykjavík hinn 8. ágúst síðastliðinn. Þar var fjallað um vígvæðingu Evrópusambandis og misbeitingu valds. Mættir á fundinn gegnum fjarfundarbúnað voru Alfred de Zayas, Husseyin Dogru, Thomas Fazi og Jeffrey Sachs. Þá umræðu tel ég eiga mikið erindi við alla þá sem greiða atkvæði um aðildarumsókn að Evrópusambandinu.
Inngangur (brot)
Augnablik sem allur heimurinn deilir getur breytt þeim heimi; ljósmynd af lítilli stúlku brennandi eftir napalm-árás gerði einmitt það. Víetnamstríðinu lauk ekki þar með, en heimurinn var vaknaður; á Vesturlöndum fóru milljónir manna út á götur og kröfðust afvopnunar og friðar, og í Austurblokkinni voru einnig mótmæli; fólk vildi meira frelsi, frelsi og frið – friðsælt frelsi; og lýðræðisbylgjurnar skoluðu leiðtogum heimsveldanna til Höfða í Reykjavík; það var ekki þeirra frumkvæði, frumkvæðið kom frá grasrótinni.
En „her-iðnaðarsamsteypan“ var ekki ánægð.
Hún fann svar við þessu í orðum rómverska lögspekingsins Cíceró: „á stríðstímum þagna lögin“.
Og þá þurfti stríð.
Og við fengum stríðið, stríðið gegn hryðjuverkum.
Og heimurinn þagnaði, eða öllu heldur var hann þaggaður niður.
Föðurlandslögin (e. Patriot Act) tóku gildi og við fengum Guantanamo.
Ég held það hafi verið Jeffrey Sachs sem vakti athygli mína á Cíceró; það gæti eins hafa verið Alfred de Zayas – hver sem það var þá tala þeir einni röddu um þessi mál. Báðir hafa verið mér og fólki um allan heim innblástur. Svo hefur einnig Thomas Fazi verið, sem einnig talaði á fundinum.
Nú notar Evrópusambandið sömu aðferðir og þeir notuðu þeir Bush yngri, Rumsfeld og Cheney.
Rússland er óvinurinn sem á að réttlæta harkalegar aðgerðir gegn öllum þeim sem þora að gagnrýna utanríkis- og hernaðarstefnu ESB. Sama gildir um NATO og ríki utan ESB í því hernaðarbandalagi.
Sú „refsiaðgerðastefna“ (sanctions policy) gegn einstaklingum, sem nú er framfylgt, er útskýrð á opinberri vefsíðu ESB: Þvingunum er ekki ætlað að vera „refsandi“ heldur aðeins leiðbeining um hvernig eigi að hugsa og hvernig eigi að bregðast við! Eins og ég sé það er þetta orðaforði valdboðsríkis eða lögregluríkis í mótun. Viðtalið við þýska blaðamanninn Husseyin Dogru ber þessu vitni.
Hugmyndin er að skapa undirgefni sem byggir á ótta. Og þar með eru dyrnar opnaðar fyrir „her-iðnaðarsamsteypunni“ til að taka forræðið eins og Eisenhower hafði varað við þegar hann lét af embætti forseta Bandaríkjanna árið 1961. Heimurinn er að breytast eða réttara: það er verið að breyta honum. Það á svo sannarlega við um Evrópusambandið.
Ég bað Alfred de Zayas, rithöfund og fræðimann og fyrrverandi óháðan sérfræðing Sameinuðu þjóðanna um alþjóðlega skipan, að útskýra (á 22:20 mínútu). Síðan kemur Husseyin Dogru (28:10), fórnarlamb viðskiptaþvingana ESB, þá Thomas Fazi, (34:95) ítalskur sérfræðingur um alþjóðamál sem er heimsþekktur, og loks Jeffrey Sachs (39:10), prófessor við Columbia-háskóla í New York, sem varla þarf að kynna. Velkomin þið öll á fundinn hér:
Grein þessi og upptakan af fundinum birtist á heimasíðu Ögmundar Jónassonar https://www.ogmundur.is/ þann 28. ágúst.
