Spánn handtók stuðningamann Palestínu sem Trump-stjórnin vill framseldann
—
Athugasemd ritstjórnar: Til viðbótar við handtöku Fergie Chambersi var Max Blumenthal, stofnandi og aðalritstjóri The Grayzone, stöðvaður og yfirheyrður í um tvær klukkustundir við komuna til Bandaríkjanna eftir ferð til Írans þar sem hann fjallaði um útför Ali Khameneis. Bandaríska landamæraeftirlitið lagði hald á tvo síma þegar Blumenthal neitaði að afhenda aðgangskóðana. Atvikin koma á sama tíma og Trump stjórnin hefur hert atlögu sína sína að róttæka vinstrinu, sósíalistum, og öðrum andstæðingum heimsvaldastefnu og síonisma.
The Grayzone hefur kynnt sér innsiglað ákæruskjal á hendur Fergie Chambers, fjárhagslegum stuðningsmanni Palestínu. Hann var handtekinn á Spáni vegna vafasamra ákæra um peningaþvætti sem dómsmálaráðuneyti Trumps setti saman. Sambýliskona hans sakar bandarísk stjórnvöld um „pólitískar ofsóknir“.
Fergie Chambers, kommúnisti, mannvinur og erfingi auðæfa Cox-fjölskyldunnar, hefur verið fangelsaður á Ibiza á Spáni samkvæmt fyrirmælum dómsmálaráðuneytis Bandaríkjanna. Samkvæmt innsigluðu ákæruskjali sem The Grayzone hefur séð bíður Chambers nú framsals til Washington vegna vafasamra alríkisákæra um „alþjóðlegt peningaþvætti […] í þeim tilgangi að veita erlendum hryðjuverkasamtökum efnislegan stuðning og aðföng“. Verði hann framseldur til Bandaríkjanna á hann yfir höfði sér allt að 30 ára fangelsi.
Hinn 10. júlí umkringdu sex ökutæki spænsku lögreglunnar bíl Chambers þegar hann ók með fjölskyldu sinni um Ibiza. Lögreglan handtók hann síðan. Frá því að handtakan fór fram hefur honum verið synjað um lausn gegn tryggingu og ekki verið leyft að hafa samband við umheiminn. Með varðhaldi Chambers stendur einstaklingur í fyrsta sinn frammi fyrir framsali frá Spáni til Bandaríkjanna vegna stuðnings við málstað Palestínu.
Chambers er erfingi gríðarlegra auðæfa Cox-fjölskyldunnar. Árið 2023 sleit hann tengslum við fjölskyldu sína og seldi hlut sinn í Cox Enterprises. Talið er að hann hafi fengið 250 milljónir dala fyrir hlutinn. Hann hét því að nota féð til að fjármagna baráttustarf í þágu félagslegra málefna og alþjóðlegrar samstöðu. Síðan þá hefur Chambers gefið meira en eina milljón dala til mannúðarverkefna sem styðja fólk sem orðið hefur fyrir áhrifum þjóðarmorðsins á Gaza, auk hópa aðgerðarsinna og fjölmiðla sem styðja málstað Palestínu.
Í innsiglaða ákæruskjalinu eru engin gögn lögð fram um að Chambers hafi gefið „erlendum hryðjuverkasamtökum“ fé. Þar segir aðeins að „Chambers hafi millifært fé margsinnis frá bönkum í Bandaríkjunum til banka í Túnis“, en þangað flutti hann síðla árs 2023.
Svo virðist sem Chambers hafi notað féð í lögmætum tilgangi, meðal annars til að fjárfesta í fyrirtækjum á svæðinu og styrkja knattspyrnuliðið Club Africain. Liðið vann í maí Ligue Professionnelle, atvinnumannadeildina í Túnis. Chambers hefur fjármagnað sambærileg verkefni, auk pólitískra og félagslegra málefna, í meira en tvo áratugi. Þar á meðal hefur hann greitt tryggingar og lögfræðikostnað vinstrisinnaðra aðgerðarsinna sem hafa verið fangelsaðir.
„Dómsmálaráðuneytið ofsækir Fergie Chambers af pólitískum ástæðum vegna þess að hann notar auð sinn til að styðja Palestínu og hjálpa fólki sem stendur frammi fyrir þjóðarmorði á Gaza. Glæpur hans er að helga líf sitt því að byggja upp betra samfélag í stað þess að arðræna fólk, draga til sín auð og hagnast á stríði,“ sagði Stella Schnabel, sambýliskona Chambers, við The Grayzone.
„Hann ætti að vera óhultur heima hjá fjölskyldu sinni og halda áfram mikilvægri baráttu sinni í mannúðar- og félagsmálum. Hann ætti ekki að sitja í erlendu fangelsi og eiga yfir höfði sér fangelsisvist í Bandaríkjunum sem jafngildir í reynd ævilöngum dómi.“
Handtaka Chambers á sér stað á sama tíma og mikil spenna ríkir milli ríkisstjórnar Trumps og spænskra stjórnvalda. Stjórnvöld í Washington hafa brugðist harkalega við gagnrýni Pedros Sánchez forseta á árásir Ísraels á Gaza og Íran, sem og neitun hans um að leyfa Bandaríkjunum að nota spænskt landsvæði til árása á Íran.
Chambers var handtekinn sama dag og Washington Post greindi frá því að Marco Rubio utanríkisráðherra hefði boðið háttsettum ráðherrum frá meira en 60 ríkjum til fundar um hvernig bregðast mætti við þeirri meintu plágu sem kölluð er „hryðjuverkastarfsemi öfgavinstrimanna þvert á landamæri“. Gagnrýnendur, þar á meðal sumir bandarískir embættismenn, saka ríkisstjórn Trumps um að ætla sér að misnota harkaleg hryðjuverkavarna úrræði til að slá niður róttæk vinstriöfl.
Í maí kynnti Sebastian Gorka, nýr yfirmaður hryðjuverkavarna Trumps, nýja „áætlun gegn hryðjuverkum“ sem beinist sérstaklega gegn meintum „vinstrisinnuðum öfgahópum“ innan Bandaríkjanna og utan. Gorka er harður stuðningsmaður Ísraels og The Grayzone afhjúpaði í nóvember 2024 að hann hefði um langt árabil unnið með bresku leyniþjónustunni.
Bandarískur embættismaður á sviði hryðjuverkavarna sagði nýlega við Washington Post að ásakanir um tengsl vinstrisinnaðra aðgerðarsinna við erlend hryðjuverkasamtök „gætu veitt aðgang að ákveðnum rannsóknarúrræðum“, þar á meðal umfangsmiklu eftirliti. Að rugla með þessum hætti saman stuðningi Chambers við aktívisma og fjármögnun Hamas fellur vel að þessari sýn
Í júní voru átta mótmælendur gegn Innflytjenda- og tolleftirliti Bandaríkjanna, ICE, dæmdir í samtals 450 ára fangelsi vegna þátttöku sinnar í óeirðum fyrir utan varðhaldsmiðstöð innflytjenda í Texas. Þyngd refsinga þeirra byggðist að miklu leyti á því að saksóknurum tókst að færa rök fyrir því að notkun þeirra á Signal forritinu til samskipta, ásamt þátttöku í leshringjum þar sem vinstrisinnaðar bókmenntir voru lesnar, sýndi að þau hefðu tekið þátt í skipulögðu samsæri um hryðjuverk.
Innsiglaða ákæruskjalið á hendur Chambers bendir til þess að stríð ríkisstjórnar Trumps gegn samstöðu með Palestínu sé að breiðast út um allan heim.
Greinin birtist upphaflega á vef The Grayzone.
