Neistar

Hamar að berja glóandi heitt járn.

Kafbátaeftirlitsæfing við Ísland. Verður annað hvert ár.

Þórarinn Hjartarson, 28. Júní 2020


Kafbátaeftirlitsskip Dynamic Mongoose
Kafbátaeftirlitsskipið ESPS Blas de Lezo fær olíu við æfingar tengdar Dynamic Mongoose frá þýska olískipinu FGS Spessart.


Tveggja vikna kafbátaeftirlitsæfing á vegum NATO verður haldin við strendur Íslands frá 29. júní nk. Herskip frá Bandaríkjunum, Bretlandi, Frakklandi, Kanada, Noregi og Þýskalandi taka þátt. Samkvæmt frétt RÚV á þetta að verða regla: „Kafbátaeftirlitsæfingar Atlantshafsbandalagsins, Dynamic Mongoose, verða framvegis haldnar á Íslandi annað hvert ár. Æfingarnar verða haldnar til skiptis á Íslandi og í Noregi.“ https://www.ruv.is/frett/2020/06/25/kafbataeftirlitsaefingar-nato-a-islandi-annad-hvert-ar?fbclid=IwAR1GNd7f70UHg16IdHv5Bs202qZQjsX9RNLFQ4Oxm81hFJ02UVsot5DaWps

Samkvæmt sænsku SIPRI-stofnuninni standa NATO-ríki fyrir 60% af herútgjöldum heims (BNA ein með 35%). En Rússland, sem NATO útnefnir sem hina miklu „ógn“, stendur fyrir 3,8% herútgjalda (1/15 af útgjöldum NATO-ríkja). Eftir að Varsjárbandalagið var aflagt þandi NATO sig austur að landamærum Rússlands (gegn gefnum loforðum frá 1990) og NATO og BNA iðka heræfingar í bakgörðum Rússlands að vestan og sunnan, en það telur NATO ekki vera neina „ógn“. Á hinn bóginn eru ekki neinir rússneskir herir sjáanlegir við landamæri BNA eða helstu NATO-velda. Það er NATO sem drífur áfram vígvæðinguna.

Ísland tekur fullan og fumlausan þátt í liðssafnaðinum gegn Rússlandi (sem einnig beinist gegn Kína). Nú orðið skiptir engu máli í því efni hvaða flokkar sitja í ríkisstjórn á Íslandi (VG ber sér stundum á brjóst og segist vera á móti NATO-aðild en styður hins vegar allar aðgerðir NATO).

NATO-flotaæfing hér annað hvert ár? Þá spyr sá sem ekki veit: Hvar og hvenær var þetta samþykkt af íslenskum stjórnvöldum og íslenskri löggjafarsamkundu? Ég man ekki eftir umræðum á Alþingi um það. Skiptir það ekki máli?

En jú, eitthvert samráð var haft við Íslendinga: „Samkvæmt tilkynningunni voru komur skipanna skipulagðar í samráði við íslensk heilbrigðisyfirvöld og viðeigandi sóttvarnaráðstafanir gerðar.“ Sem sagt engar heræfingar á Íslandi nema sótthreinsaðar!

Og jú, kannski hafði Ísland eitthvað um þetta að segja. Guðlaugur Þór Þórðarson utanríkisráðherra sagði í fyrra í samtali við RÚV. „Frá því að ég tók við sem utanríkisráðherra hef ég verið að vekja athygli kollega minna, bæði í Norður-Ameríku og sömuleiðis í Evrópu, á mikilvægi norðurskautssvæðisins vegna þess að við erum að sjá miklar breytingar á næstu árum.“ Til áréttingar sagði hann ennfremur um umferð rússneskra kafbáta í grennd við Ísland: „Það er fullyrt af þeim sem þekkja til og hefur komið fram í opinberri umræðu að þetta eru jafnvel meiri umsvif en voru á dögum Kalda stríðsins.“ https://www.ruv.is/frett/storaukin-vidvera-hermanna-vid-island Svo kannski er NATO að bregðst við neyðarhrópum frá Íslandi, hrópum um brýna þörf á virkara eftirlit með Rússum. Ísland er þá kannski með í ráðum. En málið hefur hins vegar ekki verið rætt við íslensku þjóðina.

Deila