Á Feneyjatvíæringnum í næsta mánuði verður að finna margvíslega og fjölbreytta list frá nærri 90 löndum. Fulltrúi Íslands verður Ásta Fanney Sigurðardóttir sem er myndlistakona, skáld og tónlistarkona. Ég finn engar upplýsingar um hvaða innsetningu hún býður uppá í rými Íslands en þáttaka hennar þykir ekki umdeild, að minnsta kosti.

Hópur ungra rússneskra listamanna mun fylla skála lands síns af list, það er að segja ef ekki verður strækað á þáttökuna – eins og Logi Einarsson, menningarmálaráðherra, hefur hvatt til. Af því Pútín sendi heri sína inn í Úkraínu og hefur framið þar óhæfuverk.

Fulltrúi Bandaríkjamanna á þennan menningarviðburð verður myndhöggvarinn Alma Allen sem samkvæmt lýsingu er áhugaverður listmaður sem vinnur úr steini, brons og tré – og blandar hinu lífræna efni og handbragði við tækni. Nú hefur Trump, forseti hans ráðist inn í Íran og drepið þar mann og annan og ekki undanskilið á annað hundrað skólastúlkur. Þess utan hefur hann hótað að eyða allri siðmenningu í Íran og væntanlega mun þá öll listsköpun hverfa. Logi ráðherra hefur ekki lýst því yfir að hann vilji að Alma Allen sé meinað að mæta með list sína til Feneyja þrátt fyrir þetta.

 Á þessa hátíð mun Ísrael einning senda listmanninn Belu-Simion Fainaru sem mun setja þar upp verk sem með strúktúrum og vatni endurspeglar svart tómið sem ku vera vísun í Kabbala dulhyggju gyðingdóms. Benjamin Netanyahu forsætiráðherra Belu-Simion hefur verið að dunda sér við þjóðarmorð og slátrun á tugþúsundum barna. Ég hef ekki séð ákall Loga ráðherra um að listmanninum Belu-Simion sé úthýst frá Feneyjum vegna þessara gjörða pólitískrar forystu í hans heimalandi.

Röksemdum Loga ráðherra, sem blandar sér í hóp 22 annara ráðherra, er lýst með því að það sé ólíðandi að hópur ungra rússneskra listamanna mæti á hátíðina í Feneyjum. „Ráðherrarnir lýsa þungum áhyggjum af því að Rússar varpi með því upp mynd lögmætis og alþjóðlegrar viðurkenningar sem ekki standist raunveruleikann. Slík viðurkenning stangist á við áframhaldandi stríðsrekstur þeirra í Úkraínu með eyðileggingu á þarlendum menningararfi – og alþjóðlegar refsiaðgerðir gegn þeim. Óásættanlegt sé því að Rússar taki þátt í Feneyjatvíæringnum í myndlist sem hefst 9. maí.“

Telur Logi ráðherra þá að þáttaka listamanna frá Ísrael og Bandaríkjunum „varpi upp mynd lögmætis og alþjóðlegrar viðurkenningar“ á árásarstríði, stórfelldum stríðsglæpum, aðskilnaðarstefnu, landráni og þjóðarmorði? Eða er von á framhaldstilkynningu frá ráðherra?

Pistill þessi er fésbókarfærsla höfundar frá 15. apríl