Betra að úlfurinn sleppi sauðargærunni
—
Það er siður í þessum sveitum hér að tala um Úkraínustríðið sem útþenslustríð hins vonda Pútíns og á hinn bóginn frelsisbaráttu Úkraínumanna. Jafnframt sem baráttu lýðræðisins gegn einræðisöflunum, og annað göfugt.
Trumpistarnir eru slæmir, og miklir heimsvaldatuddar. En þeir hafa sína verðleika. Þeir eru oftar en ekki sannsögulli en froðusnakkarnir frjálslyndu sem þeir keppa við vestur þar. Froðusnakkar sem þekkjast á því að það standa eilíflega út úr þeim „vestrænu gildin“. Alveg sérstaklega þegar þeir tala um Úkraínu, það er nú meiri óskapa slepjan.
Því fylgir oft mikill léttir að hlusta á góða Trumpista. Þeir tala ekki svona slepjulega, og þeir rata því oft á götu sannleikans. Marco Rubio utanríkisráðherra, nýkominn í embættið, sagði um Úkraínustríðið: „Og í hreinskilni, þetta er staðgengilsstríð [proxy war] á milli kjarnorkuvelda.“ Aðrir tala jafnvel ennþá skýrar, og mætti tilfæra margar góðar tilvitnanir frá Trump eða Pete Heggseth því til staðfestingar. Það opnar betur augu okkar og eyru þegar úlfurinn hvorki fer í sauðargæru né reynir að tala eins og amma Rauðhettu.
Ég ætla samt ekki að vitna í þessa menn núna heldur tvo aðra trumpista. Af því þeir tjá sig á óvenjulega upplýsandi hátt. Þeir útskýra fyrir manni hvað staðgengilsstríð er og hið mikilvæga, en nöturlega, hlutverk staðgenglanna.
Fyrra dæmið er Lindsey Graham heitinn. Hann var í sífellum ferðum, ýmist til Ísraels eða Úkraínu til að peppa þar upp sína menn. Han dó nú í vikunni, nýkominn frá Úkraínu – ýmsir telja reyndar að hann hafi dáið í Úkraínu, en ekki meira um það.
Hjálögð myndbandsúrklippa er frá 2022, ekki löngu eftir að Rússar hófu innrás sína. Lindsay Graham sagði eftirfarandi:
Mér líkar vel grunnaðferðin sem hér er beitt. Meðan við sjáum Úkraínumönnum fyrir þeim vopnum sem þeir þurfa og efnahagslegum stuðningi, munu þeir berjast til síðasta manns. (I like the structural path we are on here. As long as we help Ukraine with the weapons they need and economic support, they will fight to the last person.)
Annað samhengi: Í miðju þjóarmorðinu í Palestínu hvatti Lindsey Graham til að Gaza-ræman yrði flött út eins og Bandaríkin í seinna stríði höfðu flatt út þýskar borgir og Hírósima og Nagasaki í Japan. Hann var alltaf sjálfum sér samkvæmur.
Annað dæmi er Keith Kellogg hershöfðingi. Hann er raunar valdameiri maður en Graham, og hefur bæði starfað sem þjóðaröryggisráðgjafi og verið sérlegur sendimaður Trumps í Rússlandi og Úkraínu.
Í febrúar 2023 svaraði hann varnarmálanefnd Öldungadeildarinnar spurningum um Úkraínustríðið, þegar það hafði staðið í eitt ár og sagði:
ef maður getur sigrað hernaðarlegan meginandstæðing án þess að beita neinum bandarískum hermönnum þá er maður við hápunkt fagmennskunnar.
Kellogg bætti við: „Þá getum við fókusað á það sem við eigum að fókusa á þ.e.a.s. aðalandstæðing okkar sem er Kína.“ Með því varð hann ennþá meira upplýsandi – um hið víðara samhengi þessa staðgengilsstríðs, m.a. af hverju Bandaríkin þurfa að útvista því til Evrópu. Úkraínisera Evrópu.
