Þetta eru meðal nýjustu frétta frá Palestínu:

• Birgðarstöðvum fyrir neyðarmatvæli sem eru undir stjórn meintra hjálparsamtaka frá Bandaríkjunum og Ísrael, hin svokölluðu „Gaza Humanitarian Foundation“, hefur verið lýst sem dauðagildrum, þar sem „hjálparstarfsmenn“ hafa gert það að leik að skjóta að, eða á, sveltandi Palestínumenn sem leita sér aðstoðar. Að sögn heilbrigðisyfirvalda hafa um 600 manns verið drepnir á þennan hátt við þessar birgðarstöðvar, og meira en 4200 slasast. Stór hluti hinna látnu og særðu eru börn.
• Þetta er langt frá því að vera eina dæmið um grimmd og dauðaþorsta meintra hjálparstarfsmanna frá Bandaríkjunum í Palestínu þessar stundir, en fjöldi fólks hefur einnig misst lífið við birgðarstöðvar fyrir neyðargögn í Khan Younis, eftir að bandarískir málaliðar kæfðu það með táragasi er það beið eftir að fá næringu.
• Læknar í Gaza hafa greint frá því að fjöldi ungra drengja hafi undanfarið þurft læknisaðhlynningu eftir að ísraelskir hermenn skutu þá vísvitandi í kynfærin.
• Ísraelskir hermenn hafa gert það að leik að keyra yfir palestínska borgara, meðal annars barnshafandi konur, á skriðdrekum. Greint var frá þessu fyrir um ári síðan, en fréttir af þessu hafa verið lengi að berast.
• Heimildarmynd frá Al Jazeera, þar sem sérstaklega eru skoðuð tilvik í smábænum Khirbet Khuza‘a, hefur tekið saman myndskeið frá ísraelskum hermönnum. Þar segja hermenn stoltir frá því, og sýna með myndböndum, hvernig bærinn var vísvitandi jafnaður algerlega við jörðu. Öll heimili voru kerfisbundið eyðilögð og íbúarnir annað hvort drepnir eða sendir á flótta. Meðal undarlegra vana hermannanna var að halda eftir nærfötum kvennanna og dansa í þeim.
• Í síðustu viku sprengdi ísraelski herinn fólk sem beið þess að fá neyðargögn frá birgðarstöð sem átti að vera sérstaklega fyrir börn. Að minnsta kosti 10 börn og 6 fullorðnir létust í árásinni.

Þetta eru bara nokkrar af þúsundum saga um pervertíska grimmd og ofbeldisorgíu sem Síonistastjórnin í Ísrael stendur fyrir gagnvart Palestínumönnum. Líkin eftir þessa útrýmingarherferð hafa þegar náð 400 þúsund. Þetta er komið handan þess að kallast þjóðernishreinsun, þetta er útrýmingarherferð, sérstaklega ef hugsað er til þess að þetta fólk á í engin hús að venda.

Þetta eru ekki „átök“ þar sem hægt er að sjá hlutina frá sjónarhóli tveggja stríðandi fylkinga. Það er ekkert meira um þetta að segja. Allt tal um að eiga rétt á að „verja sig“ á einfaldlega ekki við þegar um er að ræða börn og fólk sem er í sannleika sagt að svelta til bana, fyrir framan heimsbyggðina.

Þess vegna er það einfaldlega ófyrirgefanlegt að tekið sé á móti Ursulu von der Leyen á þann hátt sem gert er. Hún er beinlínis meðsek; þátttakandi með samþykki, með samstarfi við þessa stjórn í Ísrael. ESB er stærsti viðskiptavinur Ísraels en hafnar öllum efnahagsþrýstingi. Hún, eins og ESB, er svokallaður „enabler“. Ef forsætis- og utanríkisráðherra segja ekkert, gera ekkert og minnast ekkert á þetta við hina fínu frú úr Brussel, þá verður aldrei, aldrei meir að marka þær.