Herkví Jemens á Rauðahafi stöðvar olíuútflutning Sáda
—

Olíuútflutningur Sádi-Arabíu hefur stöðvast og engin skip konungsríkisins hafa farið úr Rauðahafi síðan Jemen náði yfirráðum yfir Bab al-Mandabsundi fyrir nokkrum dögum, eins og staðfest var af sjóferðagögnum og skýrslum þann 15. september.

Arabian Business Gulf Insight (AGBI) sagði frá því á þriðjudag að „Sádi-Arabía hefur sett olíuútflutninginn um Rauðahaf á bið.“ Vísað er í sjóferðagögn frá Vortexa.

„Sádi-Arabía hefur ekki flutt út neina olíu um hafnir við Rauðahaf síðan á laugardag,“ bætti skýrsla AGBI við.

Xavier Tang, yfirgreinandi hjá Vortexa, sagði við AGBI að „ástandið gæti á endanum leitt til þess að konungsríkið verði um sinn nettó innflytjandi eldsneytis.“

Hafnarborgin Yanbu við Rauðahaf, sem jemenskar hersveitir hafa nýlega gert árásir á, hefur útflutningsmarkmið upp á fimm milljónir tunna á dag (bpd), samkvæmt nýlegum yfirlýsingum frá Aramco [ríkis-olíufyrirtæki Sáda].

Aramco sjálft er orðið aðal skotmark jemenska hersins (YAF) undir forystu Ansarallah. Árásir hafa verið gerðar á starfsstöðvar þess víðs vegar um landið mörgum sinnum á undanförnum dögum og vikum.

Áætlanir Vortexa herma að konungsríkið hafi nú 22 milljónir tunna af hráolíu geymdar í Yanbu-höfn, sem er nóg til útflutnings „í fjóra til fimm daga“ á fullum afköstum.

„Stöðvun útflutnings gæti stafað af flöskuhálsum í skipaflutningum,“ sagði Kate Dourian, fræðimaður við Arab Gulf States Institute, við AGBI.

Mohammad Ayyash, samgöngu- og vinnumálaráðherra í Sanaa-stjórninni í Jemen undir forystu Ansarallah, sagði á þriðjudag að „siglingar í Bab al-Mandabsundi séu komnar upp í 98 prósent,“ og bætti við að „siglingaleiðin sé örugg fyrir öll skip, séu þau ekki  sádi-arabísk.“

Nokkur sádi-arabísk olíuskip hafa orðið fyrir árásum jemenska hersins á undanförnum vikum. Að sögn hersins hafa fimm orðið fyrir árás í Rauðahafi á meðan þrjú önnur urðu fyrir árás í Ómanflóa.

Fjörutíu og átta sádi-arabískum olíuskipum hefur verið beint frá Bab al-Mandabsundi, samkvæmt yfirlýsingu jemenska hersins frá 19. ágúst.

Nýlega var gerð árás sem enginn hefur lýst ábyrgð á á mikilvæga austur-vestur olíuleiðslu Sádi-Arabíu, sem olli alvarlegum skemmdum.

Jemenski herinn hefur einnig náð yfirráðum yfir mörgum eyjum í Rauðahafi auk Bab al-Mandab sundsins, á sama tíma og hann hefur náð stórum hluta vesturstrandarinnar úr höndum hersveitanna sem studdar eru af Sádum.

Nýleg mögnun hefndaraðgerða Sanaa er tilkomin vegna árásar Sádi-Arabíu í júlí á alþjóðaflugvöllinn í Sanaa, sem hefur verið í herkví konungsríkisins í meira en áratug síðan Sádar, í forystu arabísks hernaðarbandalags, hófu sitt grimmilega stríð gegn Jemen árið 2015.

Friðarviðræður milli Sádi-Arabíu og Jemens árið 2023 leiddu næstum til samkomulags milli aðilanna tveggja.

Friðarviðræðurnar stöðvuðust, en komu þó í veg fyrir að meiriháttar stigmögnun brytist út. Samt sem áður hefur konungsríkið haldið áfram árásum sínum í mörg ár og viðhaldið ólöglegri og mannskæðri herkví sinni á jemenskar hafnir og flugvelli.

Sanaa hefur virkjað herlið sitt mikið og heitið því að reka hernaðarbandalagið undir forystu Sáda að fullu frá Jemen.

„Ef sádi-arabíski óvinurinn ímyndar sér, eftir þrjú hundruð loftárásir á fimm dögum með sádi-arabískum flugvélum sem fljúga frá Khamis Mushait og Taif herstöðvunum, að hann verði áfram öruggur og stöðugur, þá er hann í villu og reyk,“ sagði jemenska utanríkisráðuneytið í vikunni.

Yfirlýsingin kom eftir að tugir jemenskra flugskeyta og dróna beindust að þeim sádi-arabísku herstöðvum sem árásir á Jemen hafa verið gerðar frá.

Yfir 300 sádi-arabískar árásir á síðustu sex dögum hafa ekki náð að stöðva áframhaldandi framrás jemenska hersins.

Greinin birtist 15. september á The Cradle.