Fjöldi vestrænna fjölmiðla auk Vísir.is hafa undanfarna daga haldið því fram að Daniel Ortega, foresti Níkaragva, hafi tilkynnt að engar kosningar yrðu framar haldnar í landinu. Sú túlkun byggist á einni setningu sem tekin hefur verið úr samhengi úr langri ræðu sem Ortega hélt í tilefni þess að 47 ár eru liðin frá byltingu Sandínista-hreyfingunnir 1979. 

Í opinberri endurritun ræðunnar frá 19. júlí segir Ortega fyrst að tiltekin stjórnmálaöfl tengd Bandaríkjunum leggi stöðugt á ráðin um að stofna flokka sem geti komist til valda:

„Nú er þeirri sögu lokið að flokkar sem Bandaríkjamenn og Somoza-öflin koma á fót komist aftur til valda. Aldrei! Aldrei! Aldrei!“

Ortega tengir þetta við atburðina 2018, sem ríkisstjórn Níkaragva skilgreinir sem valdaránstilraun fjármagnaða af Bandaríkjunum. Síðan koma ummælin sem fjölmiðlar hafa birt án samhengisins:

„Þeir mega gleyma því. Hér verða ekki aftur haldnar kosningar sem þeir geta notað til að ná tökum á ríkisstjórninni, til að ná völdunum.“

Fornafnið „þeir“ vísar ekki til stjórnarandstöðunnar eða kjósenda almennt. Það vísar til flokkanna sem Ortega hafði rétt áður lýst sem studdum af Bandaríkjunum, tengdum Somoza-öflunum og ábyrgum fyrir valdaránstilrauninni 2018. Forseti þjóðþings Níkaragva, Gustavo Porras, túlkaði ummæli Ortega síðar með sama hætti:

„Í þessu landi verða ekki aftur haldnar kosningar sem gera heimsvaldasinnum og óvinum þjóðarinnar kleift að komast til valda.“

Vísir og The Guardian fullyrða hins vegar að Ortega hafi verið að beina orðum sínum gegn allri stjórnarandstöðu landsins en það er augljóslega rangt eins og sýnt hefur verið fram á hér að ofan. Fjöldi stjórnarandstöðu flokka eru starfandi í landinu sem falla ekki undir skilgreinignu Ortega.

Til að bíta höfuðið af skömminni eru svo samtökin sem The Guardian byggir umfjöllunina á með djúp tengsl við Bandarísk yfirvöld. ACLED (Armed Conflict Location & Event Data) er bandarísk stofnun sem hefur þegið milljónir dala frá utanríkisráðuneyti Bandaríkjanna og USAID. Fulltrúi utanríkisráðuneytisins á jafnframt sæti í stjórn ACLED og annar stjórnarmaður, Keith E. Noble, er háttsettur embættismaður ráðuneytisins sem starfaði í áratug hjá CIA.

Tiziano Breda, sérfræðingurinn sem Guardian vitnar í, starfaði til skamms tíma sem ráðgjafi utanríkisráðuneytis Bandaríkjanna um málefni Níkaragva. Bæði The Guardian og Vísir nota orð Tiziano til þess að halda þessu fram og spyrða Ortega og stjórnina í Nígaragva við einræði.

Ortega boðaði lög sem eiga að koma í veg fyrir að tiltekin öfl sem studd eru af Bandaríkjunum geti komist til valda. Hann lýsti ekki einfaldlega yfir endalokum allra kosninga í Níkaragva.

Bandarískar íhlutanir og yfirgangur hafa lengi þjakað Rómnsku Ameríku og aldrei meira en nú um stundir, og skiljanlegt að ríki sem vernda vilja sjálfstæði sitt reyni að koma vörnum við.

Það má gagnrýna þessa stefnu og spyrja hvort útilokun þessara flokka sé réttlætanlega eða ekki. En sú umræða verður að byggjast á því sem Ortega sagði í raun. Fullyrðingin „Ortega afnemur allar kosningar“ fæst aðeins með því að fjarlægja allt samhengi.